भिसीफोर्सको ज्यादती बढ्ने आशंका

2008-04-21,Monday

इलाम/ इलामको बाँझो लारुम्बा र आसपासका गाउँमा देखा परेको भिसी आतंक तत्काल समाधान नगरे त्यसले ठूलो रूप लिनसक्ने एक कार्यक्रमका सहभागीले बताएका छन् । सदरमुकाममा भएको 'लारुम्बा समस्या र स्थायी समाधान' विषयक कार्यक्रमका सहभागीले यस क्षेत्रका सर्वसाधारणले लामो समयदेखि कुटपिट, अपहरण, लुटपाटका समस्या भोगको बताए । सो क्रम जारी रहेपछि यहाँबाट विस्थापित हुनेको संख्या दिन प्रतिदिन बढ्न थालेकाले स्थायी रूपमा समाधान हुनुपर्नेमा उनीहरूले जोड दिए ।

पीडित पक्षले जिल्लामा पटक-पटक दोषीमाथि कारबाहीको माग राख्दै आए पनि पीडक पक्षले कारबाहीमा नपरी सताउने क्रम नछाडेपछि पीडित पक्षको आग्रहमा समाधानका लागि छलफल भएको हो । कार्यक्रममा सहभागी सरोकारवाला, सरकारी तथा गैरसरकारी संस्थाका प्रमुख, राजनीतिक दल, सञ्चारकर्मी र अधिकारवादीले स्थायी समाधान गर्न प्रशासनसँग अनुरोध गरे ।

कार्यक्रममा प्रमुख जिल्ला अधिकारी रामप्रसाद घिमिरे, प्रहरी नायब उपरीक्षक सन्दीप भण्डारी, कांग्रेस जिल्ला सदस्य राजेन्द्र शर्मा, एमालेका जिल्ला कमिटी उपसचिव नरेन्द्रनाथ भट्टराई, माओवादीका राज, मानवअधिकार मञ्चका अध्यक्ष डिएन पराजुलीलगायत सहभागी थिए । पीडित लारुम्बावासीले दोषीलाई उचित कानुनी कारबाही र क्षतिपूर्तिको माग राख्दै ५ वैशाखमा जिल्ला प्रशासन कार्यालयमा उजुरीसमेत दिएका छन् । पीडित पक्षको निवेदनका आधारमा पीडक पक्षलाई प्रशासनमा झिकाई भेला गर्ने प्रमुख जिल्ला अधिकारी घिमिरेले बताए ।

लारुम्बास्थित किराँत धर्मस्थल याङसेवुडाको सुरक्षार्थ गठित भिलेज कमिटी फोर्सको ज्यादती र कुटपिटबाट अहिलेसम्म सयौं व्यक्ति घाइते भएका र यसै सातामात्र २२ जना गाउाले विस्थापित हुन बाध्य भएको पूर्वगाविस अध्यक्ष किरणकुमार राईले बताए । रासस




Vincent Rai,Sampang
Yuen Long,NT
Hong Kong ...

4 82